Toponimia de san Xoán de Louredo nos mapas en liña II

Despois dos aportes de onte, imos volver ó portal do Instituto Geográfico Nacional e, desde el, podemos escoller dous camiños: ou "Cartografía y datos geográficos" ou "Mapas e imáxes" (IBERPIX). Seleccionei o idioma galego e, como vedes pola grafía, está pendente de traducción e corrección a páxina. Calquera dos dous no vai abrir un visor cunha cruz central. É cuestión de usar esa cruz como punto de mira e ir ampliando ca roda do rato ata poder ver que, no zoom 12 (vese ese dato na parte superior esquerda) aparece o nome de Louredo.

De todos modos, o interesante vai aparecer no zoom 14. No 15, e posteriores, desaparecen a maior parte dos topónimos louredeses, inda que toma o seu lugar a palabra "Hórreo". Sitio curioso onde está, desplazando a de "Cazapedo". E por alí, inda que algún hórreo hai, non é de sonada importancia. Para iso, que  a puxeran sobre o barrio da Torre, onde hai unha eira deles... Ben, volvamos ó zoom 14, que é o máis variado e interesante.

A lista de topónimos é breve, amén de coñecida: O Coutiño, Cazapedo, O Campo, O Outeiro, A Torre, O Pazo, Os veciños, O Outeiriño. Sacando este último, o resto podemos dicir que están ben colocados. Se no lugar do Outeiriño puxese O Tabolado, aceptaba a lista e a colocación sen dificultade. Un só aumento máis fai que se perdan todos, menos Cazapedo (mal colocado, pois vai onde debería ir A Touza e O Outeiro) e Os Veciños (mal colocado, pois debería poñer O Pazo), pero aporta topónimos de montes, os cales paso a nomear e que, nun futuro cercano, espero poder tratar: A Lomba Por riba do Pazo, lindando cos montes de san Benito do Rabiño e Soutelo), Chaira Longa (onde vemos sinalizada unha canteira, hoxe pechada, inda que penso que pode pasearse ata ela, denominada Laxa do Abade, visible dende a estrada Filgueira-Ribadavia), A Buratiña (cos seus montes e o campo de fútbol, en terreo do Rabiño, penso), o Cruce da Buratiña (co Coto da Forca repoblado polos de Refoxos, con eucaliptos a un lado e piñeiros a outro).

Probade a escoller diferentes capas, seleccionando esta opción na parte superior esquerda. E esperade un pouco, pois cargan con calma. 

Vamos coller o mapa no zoom 16 e xogar a colocar varios topónimos louredeses.